martes, 10 de outubro de 2017

BENVIDA AO NOVO CURSO METEOROLÓXICO

Comezamos un novo curso e continuamos co noso proxecto "O TEMPO MADE IN BUEU" dentro do Plan Proxecta. 
Arrancamos recibindo o segundo diploma de excelencia polo traballo ben feito que xa colga no recuncho METEOESCOLAS.


luns, 26 de xuño de 2017

CHUVIA, CHOIVA, CHUVA

O alumnado de 1º foi quen de aprender as 100 maneiras de chamar á CHUVIA en Galicia e o demostraron gravando este video.

RICHARD LA CIGUEÑA

Como remate de curso os nenos e nenas de 2º gozaron da película “Richard, la cigüeña” que axuda a comprender a migración de certas aves afectadas pola climatoloxía. Nesta caso, as cegoñas tiñan que migrar a Marrocos mentres que o outro protagonista, o gorrión, non necesitaba realizar dita viaxe. Co visionado desta película aproveitouse a temática para falar da adaptación dalgúns seres vivos ao medio natural e a necesidade de emigrar por parte de outros para poder sobrevivir.


xoves, 22 de xuño de 2017

DATE AND WEATHER

O alumnado do CEIP Plurilingúe A Pedra, traballa dentro das rutinas diarias da clase de inglés a data e o tempo que vai cada día. Nestes videos pódese observar cal é o procedemento:

martes, 20 de xuño de 2017

PROXECTO INTERDISCIPLINAR METEOESCOLAS

Neste curso o alumnado de 6º de primaria do CEIP plurilingüe A Pedra de Bueu, dentro do programa Meteoescolas e a modo de proxecto de fin de etapa levou a cabo un traballo interdisciplinario onde interviñeron as áreas de Lingua Galega, Ciencias Sociais, Ciencias Naturais e Matemáticas.



Utilizaron como instrumento de aprendizaxe significativo o traballo cooperativo, distribuíndose o alumnado en equipos de 3 ou 4 compoñentes.



Deste xeito traballaron os  estándares de aprendizaxe  que tiñan relación con:
O tempo atmosférico, instrumentos que serven para observalo, a garita meteorolóxica, a Lúa, factores que modifican o clima, os climas de España,  os fenómenos meteorolóxicos, a formación das nubes, acción do home no medio natural, necesidade de coidar o medio natural, os espazos protexidos.


Ademais, organizaron en  táboas as precipitacións mensuais recollidas cos datos observados polo alumnado na garita meteorolóxica do colexio nos 5 primeiros meses deste ano  e tamén calcularon as medias mensuais das temperaturas máximas e mínimas. Con toda esta información elaboraron e interpretaron un climograma comparándoo cos datos meteorolóxicos históricos de Bueu.


Tendo en conta que en expresión escrita estudaran a análise  e redacción de textos xornalísticos, presentaron a modo de reportaxe a información  recollida que acompañaron con imaxes.
Todos os traballos colocáronos no taboleiro de cadansúa clase para posteriormente podelos gravar e traballar así os estándares de aprendizaxe de expresión oral.

Todas e todos puxeron o mellor de seu e aínda que á hora de gravar houbo quen se puxo nervioso e  se equivocou, confiamos en que saberedes desculparnos.

E velaí vai o resultado de tanto traballo. Que o desfrutedes!








































mércores, 14 de xuño de 2017

WATER AND HOMES

Na clase de inglés estudamos cal é o percorrido da auga hasta que chega as nosas casas a través dunha lectura.
.

 Falamos da importancia da auga e a través dun video observamos que hai moitas maneiras de aforrar auga na nosa vida diaria
Finalmente investigamos cos nosos netbooks de que outros xeitos poderiamos contribuir nós e plasmamos nun folio todas as ideas que fomos descubrindo.




domingo, 11 de xuño de 2017

WHAT´S THE WEATHER LIKE TODAY?

Os nenos e nenas de 1º e 2º aprenden o tempo que fai na clase de inglés a través de actividades e fichas:



martes, 30 de maio de 2017

OS NENOS E NENAS DE 5 ANOS RECOLLEN OS DATOS DO TEMPO

Todos os días ao entrar ao colexio os nenos e nenas de 5 anos teñen como rutina anotar en fichas mensuais o tempo que vai en Bueu. Ao rematar o mes contan cantos días houbo de sol, anubado e con choiva.


luns, 22 de maio de 2017

COMPROBANDO O VENTO CO ANEMÓMETRO

O 27 de abril co gallo dunha saída para ver un teatro en inglés no Centro Social do Mar de Bueu e  aproveitando que facía moito vento decidimos experimentar co noso ANEMÓMETRO.

  
Buscamos un lugar apropiado preto do Centro Social e comprobamos como soplaba o vento do NORDÉS que en Bueu se coñece co nome de NORTADA.

 
Por quendas, os distintos cursos acompañados dos seus mestres/as foron experimentando a forza do vento en diferentes localizacións do pobo.


luns, 8 de maio de 2017

A IMPORTANCIA DA AUGA

Os nenos e nenas de 2º de primaria traballaron con lecturas comprensivas como "OS PRÍNCIPES DO ANO E AS NUBES DE CORES"  a importancia da auga e a necesidade de non malgastala e contaminala.
Ademais, realizaron carteis para concienciar sobre a importancia do seu aforro.



luns, 24 de abril de 2017

RECOLLIDA DE DATOS

Con moita ilusión o alumnado de Infantil recibiu a METEOCAIXA.



Despois de estudar con moito interese o seu contido desplazáronse ata o centro de Primaria para aprender máis cousas sobre o tempo atmosférico. 

 

Despois de visitar a garita meteorolóxica e tomar todos os datos importantes: temperatura máxima e mínima, cantidade de choiva, vento ...




... anotaron, ao igual que fan os maiores, toda a información recollida no taboleiro correspondente.


mércores, 12 de abril de 2017

TIPOS DE NUBES

O alumnado de 4º de Primaria deu continuidade este curso ao proxecto que empezaran o ano anterior sobre os tipos de nubes,
Na aula de informática fixeron varios LIMs para repasar aspectos importantes, xa traballados, como o clima, o tempo atmosférico e a atmósfera.


Nubes

martes, 4 de abril de 2017

AS METEOESCOLAS E AS MATEMÁTICAS

Despois de recoller diariamente na garita meteorolóxica do colexio os datos de temperaturas e pluviosidade e a partir dos rexistros de temperaturas, os rapaces e rapazas de 2º practicaron matemáticas calculando as diferencias entre a temperatura máxima e mínima, os números negativos e aproximacións decimais.Así, tamén realizaron pequenos problemas relacionados cos días e os meses: Que día foi o máis caluroso? Que día fixo máis frío?


xoves, 30 de marzo de 2017

CLIMOGRAMAS DA NOSA ESTACIÓN METEOROLÓXICA

Un climograma é un gráfico de dobre entrada no que se representan as temperaturas e as precipitacións recollidas nunha estación  meteorolóxica.

   
Consultando os datos recollidos polos distintos grupos do noso colexio, os nenos e nenas de 5º elaboraron distintos climogramas de Bueu.


Para a elaboración dos climogramas seguimos os seguintes pasos:
1.    Fixemos un eixe vertical para representar as temperaturas (TºC), un eixe horizontal para representar os días do mes e outro vertical para representar as precipitacións (P mm).


2.    Sinalamos en cada eixe o que imos a representar coas súas unidades (graos centígrados e milímetros).


3.    Miramos a temperatura máxima que tiñamos que representar e a mínima, e fixemos o mesmo coas precipitacións para escoller as escalas axeitadas.


4.    A continuación, comezamos a representar con puntos as temperaturas no centro de cada día do mes e seguidamente unimos os puntos cunha liña vermella.


5.    Fixemos o mesmo coas temperaturas mínimas, pero agora unimos cunha liña verde.


6.    Representamos as precipitacións cunha barra azul en cada día do mes.
7.    Finalmente, indicamos o significado das diferentes cores utilizadas no noso climograma.






luns, 20 de marzo de 2017

RECOLLIDA DE DATOS

Durante estes días o alumnado de 3º foi o encargado de recoller os datos da garita meteorolóxica.



 A continuación anotaron a información no taboleiro correspondente.


domingo, 5 de febreiro de 2017

INVESTIGAMOS SOBRE A AUGA

Os nenos e nenas de 2º investigaron sobre o ciclo da auga e a súa importancia para a vida.

 

Despois os rapaces e rapazas expresaron oralmente todo o proceso, e fixeron debuxos sobre o mesmo.


Tamén, falamos das propiedades da auga e reforzámolo cun anuncio moi popular “Be water, my friend” onde se destaca unha das propiedades da auga que é a súa adaptación a calquera forma:

mércores, 18 de xaneiro de 2017

Os nenos e nenas de 3 anos visitan a garita meteorolóxica do colexio

Os máis pequeniños do cole tamén se sumaron ao proxecto de meteoescolas e acompañados das súas mestras visitaron a garita meteorolóxica no patio de recreo de primaria. 



Ademáis cada día, nas follas dun calendario ían pegando iconos co tempo que facía cada día: sol, nubes ou chuvia.

martes, 10 de xaneiro de 2017

RECOLLIDA DE DATOS

Estes días os encargados de visitar a nosa garita meteorolóxica e recoller os datos foron os rapaces e rapazas de 1º de Primaria.